கதம்பம்-2

கணினி மொழிபெயர்ப்பு :

கூகுளில் தற்போது எளிதாக மொழிபெயர்க்கும் வசதிகள் வந்துள்ளது. சில நாட்களுக்கு முன்பு இந்திய மொழிகளில் ஹிந்திக்கு மட்டுமே அந்த வசதி ப்ரௌசரில் நேரடியாக இருந்தது. இப்போது தமிழிலும் அந்த வசதி வந்துவிட்டது. நீங்கள் கூகுள் க்ரோம் ப்ரௌசர் வைத்திருந்தால் நான் என்ன சொல்கிறேனென்று தெரியும். இதைக் கண்டவுடன் ஆங்கிலத்திலிருந்து ரஷ்ய மொழிக்கு மொழிபெயர்த்து, பிறகு ரஷ்ய மொழியிலிருந்து ஆங்கிலத்துக்கு கணினி மொழிபெயர்த்தது நினைவுக்கு வருகிறது. அந்த மொழிபெயர்ப்புகளை கீழே எழுதியுள்ளேன்.

ஆங்கில வாசகங்கள்:

1. The sprit is good, but the flesh is weak.

2. Out of sight, out of mind

3. Keep left

திரும்பவும் ஆங்கிலத்துக்கு வந்த வார்த்தைகள்.

1. மாமிசம் நன்றாக இருக்கிறது. வோட்காதான் கெட்டுவிட்டது.

2. குருட்டு மடையன்

3. துணைவி சென்றுவிட்டாள்.

கூகுளில் தற்போது மொழி பெயர்த்தது கிழே:

1.ஆவி நல்லது, ஆனால் சதை பலவீனமாக உள்ளது.

2. எதிரில், வெளியே மனதில்

3.விட்டு வைக்க

  

வெற்றிபெறுபவர்களின் பண்புகள்:
 

ஸ்டேன்ஃபோர்ட் நிர்வாகத்துறை பேராசிரியர் ஜெஃப்ரி ஃபெஃபெர் என்பவர் வெற்றிபெறுபவர்களின் ஆறு முக்கிய பண்புகளாக கீழ்க்கண்ட பண்புகளை வரையிடுகிறார்.

1.   தளர்ச்சி அடையாமல் தொடர்ந்து இயங்குவதற்கான மனநலம் மற்றும் உடல் வலிமை:

குறிப்பிடத்தக்க வகையில், ஆய்வாளர்கள் இதனை ஒரு பண்பாக கூறினாலும், இதுவே உண்மையில் முதன்மையான பண்பாக திகழ்கிறது. தொடர்ந்து பல மணிநேரங்களுக்கு வேலை செய்யும் குணம் வெற்றியடைந்த அனைத்து தலைவர்களிடமும் பொதுவாகக் காணப்படுகிறது. அது மற்றவர்களைவிட ஒருபடி அதிகமாக முன்னேற வழிவகுக்கிறது. ஆமை, முயல் கதைபோல தொடர்ச்சியான கடின உழைப்பினால் அவர்களைக்காட்டிலும் திறமையும், அறிவும் பெற்றவர்களைவிட முன்னேறத்துடிக்கிறார்கள். அத்தகைய உழைக்கும் திறனைக்கொண்டு, அவர்கள் மற்றவர்களுக்கு முன்மாதிரியாகவும் அடையாளம் காணப்பட்டு பின் தொடரப்படுகிறார்கள்.

2.   சிதறாத ஒருங்கிணைப்பான கவனம்:

இந்தப் பண்பு பொதுப்படையாகத் தோன்றினாலும், ஆராய்ச்சியின்படி, மிகவும் வெற்றிபெற்றவர்கள், தொடர்ந்து ஒரே துறையில் அதிகமான கவனம் செலுத்தியவர்களாக அமைந்திருப்பது தெரிகிறது. ஒரே துறையில் தொடர்ந்து இருப்பவர்களே அந்தத் துறையில் மேல் நிலையை அடைந்திருக்கிறார்கள்.

3.   அடுத்தவர்களுடைய நிலையைப் புரிந்துகொள்ளும் தன்மை:

அடுத்தவர்களுக்கு என்ன தேவைப்படுகிறது, எப்படி அவர்களுடைய அலைவரிசைக்கு உரையாடுவது என்று அறிந்திருப்பதை மூன்றாவது பண்பாகக் குறிப்பிடுகிறார். அடுத்தவர்களுடைய தேவைகளைப் புரிந்துகொள்வதையும், அவர்களுடைய தேவைகளை நிறைவேற்றுவதையும் அவர் ஒன்றாகக் கூறவில்லை. அடுத்தவர்களுடைய தேவைகளைப் புரிந்துகொள்வதை முதன்மையாகவும், அந்தத் தேவைகளை பூர்த்தி செய்வதை பேச்சு வார்த்தைகளைக் கொண்டு அவர்கள் ஒரு இணைந்த முடிவெடுப்பதாகவும் அவர் குறிப்பிடுகிறார்.

4.   வளைந்துகொடுக்கும் தன்மை:

ஒருவர் தன்னை மாற்றிக்கொள்ளாமல் அடுத்தவர்களைப் புரிந்து கொள்வதென்பது இயலாத காரியம். மாற்றிக்கொள்வதென்பது எதிர்மறையாகத் தோன்றினாலும், வாழ்வில் வெற்றி பெறுவதற்கு அது ஒரு முக்கியமான திறமை. தன்னுடைய எண்ணங்களிலோ செயலிலோ மாற்றமில்லாமல் விளைவுகளில் மட்டுமே மாற்றம் காண நினைப்பது எப்படி முடியும்? இங்கு பழையன கழிதலும், புதியன புகுதலும் விதியை ஒத்து நோக்க வேண்டும். வளைந்து கொடுப்பது புதிய நண்பர்களையும், புதிய உத்திகளையும் கற்றுக்கொள்ள உதவும்.

5.   எதிர்ப்புகளையும், மோதல்களையும் எதிர்கொள்ளும் பண்பு:

எதிர்ப்புகளையும், மோதல்களையும் சந்திக்கத் துணிவில்லாமல் அதிக வெற்றிகளைப் பெற முடியாது. சில நேரங்களில் எதிர்ப்புகளைச் சந்தித்தே ஆகவேண்டும். எதிர்ப்புகளை சந்திக்கவும், சமாளிக்கவும் துணிந்தவர் என்று அடையாளம் காணப்படுவது எதிர் காலத்தில் நல்ல பலனைத் தரவல்லது. தலைமைப் பதவி தேவைப்படுவதற்கு முக்கிய காரணம் எதிர்ப்புகளே ஆகும். எதிர்ப்புகளைச் சந்திக்கும் துணிவு மிகவும் அவசியமானதொன்றாகும்.

6.   நான் என்ற மமதையை சில சமயங்களில் விட்டுக்கொடுத்துச் செல்லுதல்:

எப்பொழுதும் விட்டுக்கொடுத்துச் செல்வதோ அல்லது எப்பொழுதும் எதிர்ப்புகளை மட்டுமே சந்திப்பதோ வெற்றி அடைவதற்கு சாதகமாக அமையாது. கூட்டணிகளும், நண்பர்களும் தினசரி வாழ்க்கைக்கு பயனுள்ளதாக இருக்கவே செய்கின்றன. மற்றவர்களுடன் இணக்கமாக இருப்பதற்கும், கூட்டணி அமைப்பதற்கும் நான் என்ற மமதை எப்பொழுதும் இடையூராக அமைந்துவிடுகிறது. தலைமைப்பதவியில் இருப்பவர்கள் சமயத்துக்கேற்றபடி வளைந்துகொடுத்து காரியத்தை சாதிக்கும் திறமையையும் பெற்றிருக்கிறார்கள். நான் என்ற மமதையை விட்டுக்கொடுத்து காரியத்தை சாதிக்கும் திறமையை இறுதியான பண்பாகக் குறிப்பிடுகிறார்.