சிறுகதை – 4

மெய்போலும்மே.

இந்த வார செய்திகள் :

உலக நாடுகளுக்கு அமெரிக்கா செய்யும் இத்தகைய மனிதாபிமான உதவிகள் மிகவும் பாராட்டத்தக்கதொன்று. ஒவ்வொரு வளர்ந்த நாடும், அமெரிக்காவின் பாதையைப் பின்பற்றினால், உலக நாடுகள் அனைத்தும் சுதந்திரமாகவும், இன்பமாகவும் வாழும் நாட்கள் வெகுதொலைவில் இல்லை. அமெரிக்காவுடன் சேர்ந்து நாங்களும் எங்களாலான உதவிகளை தேவைப்படும் நாடுகளுக்கு கண்டிப்பாக செய்வோம் – இங்கிலாந்து

ஒரு சகோதரன் துன்பத்தில் இருக்கும் நேரத்தில், அவனுடைய மற்ற சகோதரர்கள் உதவி செய்வது இயல்பான ஒன்று. இத்தகைய மனிதாபிமான உதவிகளுக்கு நாங்களும் அமெரிக்காவுடன் கைகோர்ப்பதில் பெருமை அடைகிறோம். – ஆஸ்திரேலியா.

அமெரிக்காவின் போர் விமானங்கள் தேவையான மருத்துவ உபகரணங்கள், வசதிகள் மற்றும் மோப்ப நாய்களுடன் சீனாவின் ஷங்காய் நகரில் தரையிரங்கின. பூகம்பத்தால் நிலை குலைந்த ஷங்காய் நகருக்குத் தேவையான அனைத்து உதவிகளையும் செய்யக் காத்திருக்கிறோம் என்று அமெரிக்க அதிபர் பேசியது இங்கு குறிப்பிடத்தக்கது. அமெரிக்கா இதுவரை கிட்டத்தட்ட 10 பில்லியன் அமெரிக்க டாலருக்கு மேல் உதவிகள் வழங்கியிருப்பதாக செய்திகள் தெரிவிக்கின்றன.

ஒரு வாரத்துக்கு முன்பு ஏற்பட்ட பூகம்பத்தால் சீனாவின் வணிகத் தலைநகரான ஷங்காய் நிலைகுலைந்துவிட்டது. கடந்த நூறு ஆண்டுகளில் ஏற்பட்ட பூகம்பத்தில், அதிக பொருள் சேதத்தையும், உயிர் சேதத்தையும் ஏற்படுத்திய பூகம்பம் இது என்று புள்ளியியல் விபரங்கள் கூறுகின்றன. ஷங்காய் மிகவும் மக்கள் நெருக்கமுள்ள நகரமாக இருந்ததால் இழப்புகள் மிகவும் அதிகமாக இருப்பதாகத் தெரிகிறது.

- இந்த வார செய்திகளுக்கு ஒருமாதத்துக்கு முன்பு : 

“நான் ஒத்துக்கொள்ள மாட்டேன் என் உயிரே போவதாயிருந்தாலும் இதற்கு நான் ஒத்துக்கொள்ள மாட்டேன்.” விஞ்ஞானி டாக்டர்.ஸ்கொயர் ஆவேசமாகக் கூறினார்.

“நம் நாடு பிரச்சனையில் உள்ளது. இந்த நிலை நீடித்தால், இன்னும் பத்து இருபது வருடங்களில் உலக அரங்கில் நாம் நமது நிலையை இழந்துவிடுவோம். சீனாவின் கை ஒங்கிவிடும். நம் நாட்டின் வளர்ச்சி இதனால் தடைபடும் என்பதையாவது ஒத்துக்கொள்கிறீர்களா?” வெள்ளை மாளிகையின் உயர் அதிகாரி டாக்டர்.ஸ்கொயரிடம் அமைதியாக வினவினார்.

“இது மனித குலத்துக்கே அநீதி. இப்படி ஒரு நிலைமை வரும் என்று தெரிந்திருந்தால், நான் கண்டுபிடித்ததை உங்களிடம் கூறியிருக்கமாட்டேன்.” பூகம்பம் ஏற்படுவதை முன் கூட்டியே துல்லியமாக கணிக்கும் முறையைக் கண்டுபிடித்த டாக்டர்.ஸ்கொயர் வருத்தம் தொனிக்கும் குரலில் பதிலளித்தார். பூகம்பத்தைக் கணிக்க டாக்டர்.ஸ்கொயர் கண்டுபிடித்த முறைகள் இன்னும் அறிவியல் உலகில் அதிகாரபூர்வமாக அறிவிக்கப்படவில்லை. அவ்வாறு பூகம்பத்தைக் கணிக்கும் ஆய்வின்பொழுது, எதிர்பாராவிதமாக, உலகின் குறிப்பிட்ட இடத்தில், குறிப்பிட்ட அளவு
செயற்கையாக பூகம்பத்தை ஏற்படுத்தும் முறையையும் டாக்டர்.ஸ்கொயர் கண்டுபிடித்தார். அந்தக் கண்டுபிடிப்பையே தற்போது “நான் கண்டுபிடித்ததை உங்களிடம் கூறியிருக்கமாட்டேன்.” என்று டாக்டர்.ஸ்கொயர் கூறினார்.

“சரி விடுங்கள்.” வெள்ளை மாளிகையின் அதிகாரி அறையைவிட்டு வெளியேறினார்.

மறுநாள் ஒரு துணுக்காக கீழேயுள்ள செய்தி சில ஊடங்களில் காணப்பட்டது.

“டாக்டர்.ஸ்கொயர் என்ற விஞ்ஞானி நேற்று மாலை பணியில் இருந்தபொழுது, மாரடைப்பால் காலமானார். அன்னார் இன்னும் ஓரிரு வருடங்களில் நோபல் பரிசு பெறுவார் என்று பெரிதாக எதிர்பார்க்கப்பட்டவர் என்பது குறிப்பிடத்தக்கது.”

"பொய்யுடை யொருவன் சொல்வன்மையினால் 
  மெய்போலும்மே; மெய்போலும்மே 
 
 மெய்யுடை யொருவன் சொல்லமாட்டாமையால் 
  பொய்போலும்மே பொய்போலும்மே."

துணுக்கு :

நேர்மையானவர்களைக் காண்பதால் அதிர்ச்சியடைபவர்களின் எண்ணிக்கை, ஏமாற்றுக்காரர்களை காண்பதால் அதிர்ச்சியடைபவர்களைவிட அதிகமாக இருப்பது மிகவும் கவலையை அளிக்கிறது.

-நோயல் கோவார்ட்

ஏமாற்றுக்காரர்களுக்கு, ஏமாறுபவர்கள் எப்பொழுதும் கிடைத்துக்கொண்டே இருப்பார்கள்.

-நிக்கொலோ மச்சியவெல்லி.